DIARIO VASCOn: Goihaitz

Goihaitz Perez Bertarbide gazte oiartzuarra, 'Txapela buruan' saiorako aukeratua

Beste hiru gazterekin otsailean abiatuko dira Europa aldera eta martxoan hasiko dira saioa emititzen 

Goihaitz Perez Beratarbide gazte oiartzuarra ETB-1eko 'Txapela buruan' saiorako aukeratu dute. Iturrioztarrak bere burua aurkeztu zuen castingean esanez mutil irekia dela eta leku berriak eta jende berria ezagutzea nahi duela. Hemezortzi urteko mutilak «bidaiatzea oso gustuko» du, «baita mendizaletasuna ere». Kontua da azken hilabeteetan Irlandan ibili dela ingelesa ikasten eta Gabonetarako etxera etorria zela.

Aurreko ostiralean EITBren Bilboko egoitzak aurki ETB-1en estreinatuko duten 'Txapela Buruan' saioaren castinga hartu zuen. Ehunka gazte aurkeztu ziren bertara, eta egun osoko lan saio luzearen ostean, aukeraketa prozesua abiatu zuten saio berri horretako arduradunek. Asteburuan gogoeta luzea egin dute, eta dagoeneko aukeratu dituzte lau gazteak: Bi neska bizkaitar, Gasteizko mutil gazte bat eta oiartzuarra. Lau gazte horiek otsailean abiatuko dira Europa aldera, eta martxoan hasiko dira saioa emititzen.

Saioaren egitura

Lau gazte horiek hamabost eguneko InterRail bidaia egingo dute, eta Europan barrena izandako abentura erakutsiko du saioak. Hautagaiek jende eta leku berriak ezagutuko dituzte, eta ikusleak haien esperientziaren lekuko izango dira.